Полициски службеник во Хонг Конг бил погоден со стрела кога полицијата употребила солзавец и водени топови во обид да ги растера демонстрантите кои го окупираат кампусот на универзитетот.
Фотографиите, објавени на Фејсбук страната на полицијата, покажуваат дека стрела погодила полицаец во долниот дел од ногата, по што тој е префрлен во болница.
Демонстрантите одбија да се повлечат, иако во обид да се приближат до демонстрантите камиони со водени топови ги преминуваа циглите што тие ги поставија.
Демонстрантите почнаа да се повлекуваат во Политехничкиот универзитет дури кога се смрачи, стравувајќи дека ќе се најдат во замка бидејќи полицијата употреби солзавец и им пристапи од спротивната страна.
Политехничкиот универзитет во Хонг Конг е еден од бројните универзитетски кампуси, кои во последната недела се користени како места за собирање на демонстрантите.
Демонстрантите од покривот на универзитетот ја гаѓаа полицијата со стрели и молотови коктели.
