Двајца американски војници се убиени, а уште шестмина други се повредени во вооружен напад во авганистанската источна провинција Нангахар.
Полковникот Сони Леџет, кој е портпарол на американските сили во Авганистан, преку соопштение информира дека човек во авганистанска униформа отворил оган од автоматска пушка врз комбинираните американско-авганистански воени сили.
Повредените војници биле медицински згрижени во американската болница.
Во други извештај, сепак, се укажува на престрелка меѓу авганистанските и американските сили за време на заедничка операција, што предизвикала жртви на двете страни.
– Сè уште собираме информации и причината или мотивот за нападот засега е непозната. Инцидентот се истражува – додаде Леџет.
Нангархар е меѓу најнемирните провинции во Авганистан, каде што своите бази имаат и талибанците и милитантите на Исламска држава.
Од почетокот на 2020 година во Авганистан загинаа четворица американски војници, додека лани загинале 20.
Во моментов во Авганистан има околу 12.000 американски војници.
