Свет 17. ноември 2020. / 11:44

Адвокатката на Трамп бара смена на директорката на ЦИА бидејќи не реагирала на „изборната измама“

Адвокатката на Трамп бара смена на директорката на ЦИА бидејќи не реагирала на „изборната измама“

Законскиот застапник на актуелниот претседател на САД, Доналд Трамп, Сидни Пауел, изјави дека директорката на Централната разузнавачка агенција (ЦИА), Џина Хаспел, треба да биде „сменета“ затоа што немала забелешки и не се огласила за употребата на изборниот софтвер „Доминион“, за кој Трамп и неговите приврзаници сметат дека бил инструмент со кој е извршена „изборната измама“.

Во интервју за „Фокс Њуз“, Пауел наведе дека софтверскиот систем „Доминион“ се користел во неколку држави каде што победи Бајден.

Иако овие тврдења беа побиени од бројни неутрални експерти, Пауел тврди дека има свиркачи кои ќе и презентираат на јавноста информации дека овој софтвер бил користен за бришење на милиони гласови на гласачите на Трамп.

-Не разбирам зошто Џина Хаспел е сè уште на чело на ЦИА. Таа треба веднаш да биде сменета – изјави Пауел.

На новинарско прашање дали има докази што ги поткрепуваат нејзините тврдења, Пауел одговори дека нема намера да објавува такви информации на телевизија.

Хаспел беше назначена за директорка на ЦИА од Доналд Трамп во 2018 година и таа е првата жена во историјата на ЦИА која е назначена на таа позиција.