Свет

16-годишно девојче силувано, па живо запалено

16-годишно девојче силувано, па живо запалено

Индија има голем проблем со сексуални деликти. Силувањето и убиството на 16-годишно девојче е најновиот од големиот број случаи. Во 2016 година се пријавени 40.000 случаи на сексуално насилство, пишува Дојче веле.

Двајца мажи на истокот на Индија силувале 16-годишно девојче и потоа го запалиле живо. Сторителите на кривичното дело во четвртокот го грабнале девојчето од нејзиниот дом и го силувале во шума, соопшти полицијата. Семејството на жртвата го пријавило злосторството во советот во местото на живеење, т.н. Селски совет. Советот во петокот ги осудил двајцата мажи на сто стомачни склекови и парична казна од 50.000 рупии (околу 625 евра).

Од бес поради казната, обвинетите потоа се втурнале во домот на жртвата, соопшти полицијата. Таму ги истепале родителите и го запалиле 16-годишното девојче. Извршителите сега се во бегство, а со случајот се занимава специјална комисија, изјави портпарол на полицијата во индиската сојузна држава Џакрханд.

Во Индија често за кавгите и споровите одлучуваат локалните Совети на најстарите членови на заедницата. Со тоа се избегнуваат долгите и скапи судски процеси. Иако немаат формална правосудна функција, Советите имаат големо влијание во селските региони во Индија.

Силувањето и убиството на девојчето е најновиот од многуте вакви случаи во земјата. Минатиот месец имаше групно силување и убиство на осумгодишно девојче во Џаму. Поради тоа имаше протести ширум земјата. Владата потоа донесе одлука за воведување смртна казна за лица кои силуваат деца кои немаат наполнето 12 години.