Српската премиерка Ана Брнабиќ изјави дека соработката на српските власти со косовските институции ќе зависи од нивното исполнување на меѓународните обврски поврзани со спроведувањето на Бриселскиот договор и укинувањето на таксите на увозот на стоки од Србија.
– Отсекогаш сме биле подготвени да соработуваме и да разговараме со привремените косовски институции, но тоа ќе зависи од спроведувањето на Бриселскиот договор, односно од исполнувањето на обврската за формирање на Заедницата на српски општини (СЗО), како и од укинувањето на нецивилизациските такси – изјави Брнабиќ прашана дали ќе соработува со новата влада на Косово.
Брнабиќ додаде дека идните разговори и соработката ќе зависат од „г-дин (Албин) Курти“ кој ќе биде косовски премиер.
– Ние сме подготвени да разговараме со сите, таму каде што живеат Србите за да се подобри нивната положба – порача српската премиерка.
Брнабиќ оцени дека Српска листа во Косово има добиено 10 места во косовскиот парламент и дека сега ќе биде посилен фактор на Косово.
