Бугарскиот претседател Румен Радев ја искоментира изјавата на рускиот претседател Владимир Путин дека Русија може да најде алтернатива за Бугарија доколку се отежнува изградбата на гасоводот „Турски поток“.
– Не мислам дека треба да поаѓаме од заканите на господинот Путин. Мораме да поаѓаме од сопствените интереси, нашите амбиции – дали Бугарија може да остане на европската карта на транзитот на гас по неуспехот на „Јужен поток“ – изјави Радев за бугарската телевизија БТВ.
Според Радев, владата од своја страна вложува напори, но важно е да се сфати дека таквото одолговлекување има своја цена.
– Мораме да бидеме искрени, луѓето тоа мора да го знаат. Ние, Бугарите, даваме свои пари за рускиот гас да може да дојде до Европа – посочи Радев.
Бугарсиот претседател додаде дека Бугарија треба да направи анализа кога проектот ќе биде исплатлив.
– Слушам мислења дека тоа ќе се случи за 15 години. Петнаесет години е долг период. За тоа време може да се изградат уште повеќе терминали за природен течен гас и да се обезбеди диверзификација на испораките на гасот – истакна Радев.
Изјавата на Путин, дека Бугарија намерно ја одложува реализацијата на проектот, Радев смета дека треба да ја искоментира Владата.
