На островот Самос, каде што во прифатен центар за мигранти наменет за 648 лица, според официјалните податоци, престојуваат 5999 луѓе, ќе се гради уште еден центар за прием и идентификација, соопшти портпаролот на грчката влада, Стелиос Пецас.
– Самос има околу десет пати повеќе население во центарот за прием и идентификација од она што по правило би требало да има. Ситуацијата е многу тешка. Правиме сѐ што можеме за да ја растовариме областа и имаме јасен временски рок, нешто за кое ќе бидеме во можност да го соопштиме во следните денови, во однос на изградбата на друг центар за прием и идентификација за да може да стане похуман процесот за овие луѓе, како за жителите, така и за оние што се сместени таму – изјави Пецас.
За процесот на распределување на бегалците и мигрантите од островите во други делови на Грција, Пецас изјави дека е завршен конкурсот од Меѓународната организација за миграции (ИОМ) за хотелите кои што понудиле да примат лица што имаат профил на бегалци. Тој објасни дека ги разгледуваат резултатите, а соработуваат и со локалните власти и секогаш во согласност со локалното население.
– Она што ние гледаме да го направиме по завршувањето на конкурсот е да видиме кои се областите што се со прекумерен број, постојат други каде што има помалку и да постои распределба на праведен начин. Уште еднаш повторувам дека ова се однесува на луѓе кои имаат бегалски профил и во главно говориме за семејства – објасни Пецас на редовен брифинг со новинарите.
Утре e планирано грчкиот Парламент да гласа за новиот закон за процедурите за доделување азил, а веројатно обраќање пред пратениците ќе има и премиерот на Грција, Кирјакос Мицотакис.
