Претседателката на Грција, грчкиот премиер, Министерството за надворешни работи, како и лидерот на СИРИЗА, преку нивните официјални Твитер профили упатија честитки до новоизбраниот претседател на САД Џо Бајден.
– Џо Бајден беше вистински пријател на Грција и сигурен сум дека под неговото претседателство, односите меѓу нашите земји ќе станат уште посилни, напиша грчкиот премиер Кирјакос Мицотакис.
Претседателката на Грција Катерина Сакеларопулу, им честиташе и на Бајден и на првата жена потпретседателка на САД и на Твитер напиша дека очекува „проширување на соработката и пријателството“ меѓу двете земји.
– Првиот чекор е да им посакаме повторно добредојде на САД во Парискиот договор за климатските промени!, напиша меѓу другото Сакеларопулу.
Грчкото МНР, во два посебни твита испрати одвоени честитки до Бајден и Харис, истакнувајќи дека очекуваат да продолжи „зајакнувањето на одличното грчко – американско партнерство и понатамошно зајакнување на врските меѓу ЕУ и САД“.
Честитки до Бајден испратија и лидерите на грчките опозициски партии, меѓу кои и поранешниот премиер на Грција, а сега лидер на СИРИЗА, Алексис Ципрас.
