Поранешниот косовски премиер Рамуш Харадинај го поздрави потпишувањето на писмото за намери за обновување на железничкиот и патниот сообраќај меѓу Косово и Србија.
Преку објава на Твитер, Харадинај порача дека сега е време за „големото финале“, односно конечниот договор меѓу Косово и Србија, со меѓусебно признавање на двете држави.
Харадинај особено ја нагласи улогата на американскиот претседател Доналд Трамп и на неговиот специјален пратеник, амбасадорот во Германија, Ричард Гренел во водењето и олеснувањето на дијалогот Приштина – Белград.
– Им ракоплескам на визијата и лидерството на Ричард Гренел и на американскиот претседател за водењето и ефикасното олеснување на нормализирањето и функционализацијата на железниците и автопатиштата што ги поврзуваат Косово и Србија. Сега е потребно големото финале, меѓусебното признавање, како што потенцира и американскиот претседател во двете писма од минатата година – напиша Харадинај.
I applaud @RichardGrenell & @POTUS vision & leadership in effectively facilitating the functional normalisation of the rail & highways connecting #Kosovo & #Serbia. Now the Grand Finale is needed: Mutual Recognition, as @POTUS rightly highlighted in the two last year letters.
— Ramush Haradinaj (@haradinajramush) February 14, 2020
Писмото за намери за обнова на железничкиот и патниот сообраќај меѓу Косово и Србија е потпишано од претставници на надлежните институции на двете земји. На потпишувањето, покрај амбасадорот Гренел, присуствуваа и претседателите на двете држави, Хашим Тачи и Александар Вучиќ.
Претходно, минатиот месец, во Берлин беше потпишано писмо за намери за обновување на воздушниот сообраќај меѓу Приштина и Белград.
