Премиерот на Косово, Рамуш Харадинај, вели дека Косово нема отворени прашања со Босна и Херцеговина, како и дека сочувствуваат со таа земја.
На презентацијата на годишниот извештај на Министерството за регионален развој, предводена од Расим Демири, тој говорејќи за царините кои Косово ги воведе за Србија и Босна и Херцеговина, како и односи со Босна и Херцеговина, изјави дека БиХ е земја која заслужува почит и соработка со Косово.
– Сакаме Србија, по овие наши активности да нè признае. Тие имаат потреба од нашиот пазар, а ние од признавање, но исто така ние сакаме да ѝ олесниме и на Босна и Херцеговина утре да донесе одлука за признавање на Косово, бидејќи ние немаме отворени прашања со БиХ и ние не сакаме да ги повредиме со оваа одлука – рече Харадинај.
Тој додаде дека одлуката на Владата на Косово не е донесена со цел да се наштети на односите меѓу нациите, туку дека се работи за одредено делување, а тоа се однесува на добивање признавање од овие две земји.
Со оглед на тоа дека Демири е од бошњачката коалиција Вакат, Харадинај ѝ се заблагодари на бошњачката заедница, која го поддржа формирањето на војската на Косово, наведувајќи дека ова е и нивна војска.
Косово воведе царински давачки од 100 отсто за стоки од Србија и БиХ, објави РСЕ.
