Владиниот комесар за првичниот прием на бегалци, Манос Логокетис, за австрискиот весник „Дер Стандард“, нагласи дека Владата во Атина очекува следната година околу 100.000 мигранти од Турција да се упатат кон грчките острови.
– Кризата е актуелна и сериозна – истакна Логокетис.
Логокетис изјави дека во 2020 година грчката Влада планира да депортира 10.000 баратели на азил во Турција. За таа цел, ќе бидат ангажирани дополнителни 270 лица за да помогнат во процесот на азил.
Освен тоа, на пет острови ќе бидат изградени нови прифатни центри, кои го носат товарот на миграциското движење.
Со месеци, бегалци доаѓаат на Егејските острови преку Турција. Состојбата во тотално пренатрупаните кампови за регистрација излегува од контрола, условите таму се драматични, според хуманитарните извештаи, нагласува весникот.
Според најновите информации од Атина, над 41.000 луѓе продолжуваат да живеат во камповите на островите. Ова е најголем број мигранти регистрирани од потпишувањето на договорот меѓу Турција и Европската унија (март 2016 година).
