Српскиот министер за труд и социјални прашања Зоран Ѓoрѓевиќ изјави дека либералниот пристап кон мигрантската криза, како и отворањето на граници со Македонија и Албанија за слободен проток на луѓе, стоки и капитал, не значи дека во Србија ќе се населат мигранти и дека тогаш Србите ќе нема каде да живеат.
Тој исто така кажа дека работната сила од овие две земји нема да ги намали можностите за вработување на домашното население.
Ѓорѓевиќ во утринската програма на „Хепи телевизија“ изјави дека „малиот Шенген“, како што се нарекува договорот постигнат во Тирана, е проект што ќе го олесни добивањето на работна дозвола за работниците од земјите кои се потписнички на овој договор.
Тој додаде дека следната година Србија ќе донесе „индустриска стратегија“, со која ќе се покаже каде сака економски да биде за 50 години и, соодветно на тоа каква работна сила и е потребна.
Министерот оцени дека економските миграции секогаш постоеле и дека движењето на работна сила постои низ цела Европа, а не само на Балканот.
– Ние сакаме да ја развиеме нашата земја да биде економски силна. Идејата за „малиот Шенген“ е дека повеќе нема да ви треба работна дозвола, односно тоа е поедноставен начин да добиете дозвола за работа, да работите без да чекате. Пред да се постигне договорот за ‘малиот Шенген’, законот предвидуваше дека кога една компанија сака да донесе работник кој не е од Србија, потребни и беа три месеци додека тоа лице не добие прво дозвола за престој, а потоа и дозвола за работа – изјави Ѓoрѓевиќ.
Тој кажа дека од 1 јануари граѓаните на Србија, Македонија и Албанија ќе можат да ги преминат границите само со лична карта и веќе на граница ќе можат да се пријават за дозвола за работа.
За работа во Србија граѓаните од странство, ќе можат да аплицираат исто така кога аплицираат за виза.
– Додека во амбасадата се обработува апликацијата за виза, некој од странство ќе може паралелно да се пријави и во Националната служба за вработување. Ние секогаш прво гледаме дали постои таков кадар во евиденцијата на Националната служба за вработување и приоритет ќе и биде даден на домашната работна сила – порача Ѓорѓевиќ.
