На четвртиот ден од пробниот попис на населението кој се одржува во 13 општини, Заводот за статистика се соочува со технички проблеми при анкетирањето со помош на компјутерскиот софтвер, пренесе АлсатМ.
Заменик директорот Зирап Адеми вели дека овие пречки ќе се елиминираат со цел да не се повторат во редовниот попис следната година. Адеми вели дека од организациски аспект нема да бидат доволни 5.000 анкетари и следната година ќе се ангажира дополнителен кадар. Првичните податоци говорат дека околу 35% од населението кое направило внатрешна миграција, не ги сменило адресите во личните документи.
– Во онлајн пописот евидентиравме лица кои имаат вообичаено место за престој бидејќи пописот е статистичка операција. Ако одредено лице живее во општина Центар, но службената адреса му е во Гостивар, во резултатите ова лице се смета како жител на Центар. – изјави Зирап Адеми, заменик/директор на Заводот за статистика.
На пописот следната година, освен редовните жители, државјаните на Македонија кои живеат во дијаспората ќе можат да се запишат од нивните најблиски преку матичен број или лично електронски. Токму на ова се противи ВМРО ДПМНЕ, од каде се закануваат со повик за бојкот на пописот. Од партијата на Мицкоски велат дека ако не се вклучат во процесот на подготвување на Законот, против операцијата ќе бидат и во другите елементи.
Од Заводот за статистика истакнуваат дека ако најмалку 100 илјада државјани ја бојкотираат оваа операција, тогаш резултатите не можат да се сметаат за релевантни. Според законските одредби, сите граѓани кои нема да прифатат да бидат анкетирани, можат да добијат глоба од 200 до 400 евра по лице. Додека Заводот го тестира пописот, Предлог – законот за попис на населението продолжуваа да биде во матичната комисија во Собранието. Првата седница беше одложена, а следната се очекува да се одржи оваа недела.
