Втор ден сме овде во Париз, разговараме со претставници на францускиот Сенат и Парламентот. Разговараме за актуелната политичка и економска состојба во Македонија, но истовремено разговараме и за новата методологија која беше содржана во таканаречениот документ „Нон пејпер“, кој што беше претставен на европската, но и на македонската јавност, изјави лидерот на ВМРО ДПМНЕ, Христијан Мицкоски од Париз.
Ја пренесовме нашата порака дека после следните предвремени парламентарни избори кои што ќе се случат во април месец следната година, владата на ВМРО-ДПМНЕ ќе се фокусира на исклучително квалитетни реформи од областа на владеењето на правото, обезбедување независно обвинителство, независно судство, нешто што недостасува во овој период. Односно сето она кое што денеска добро изгледа на хартија ќе биде можеби подобрено, но сето она кое што денеска во пракса практично не е применливо ќе биде испорачано во реформите кои што следната влада на ВМРО-ДПМНЕ ќе ги донесе во Македонија, веднаш после предвремените парламентарни избори, изјави Мицкоски.
Понатаму зборувавме за можната економска соработка, зголемување и продлабочување на дипломатските односи помеѓу двете земји, бидејќи Франција била и останува стратегиски партнер на нашата држава и главен промотор во рамките на НАТО Алијансата и во рамките на Европската Унија.
Практично ја пренесовме пораката дека идната влада на ВМРО-ДПМНЕ нема само да ветува, туку тоа што ќе го вети практично и ќе го испорача. Во рамките на владеењето на правото, бескомпромисна борба со криминалот, бескомпромисна борба со корупцијата и што она кое што денеска, повторно ќе кажам изгледа добро на хартија, но за жал имплементацијата недостасува следната влада на ВМРО-ДПМНЕ ќе го имплементира и ќе биде дел од политиките на идната влада, истакна Мицкоски.
