Иван Лотевски од охридската населба Варош го фати крстот фрлен во водите на Охридско Езеро за Богојавление. Ова не е првпат да скока по светиот крст, имал среќа да го фати и лани.
-Не очекував и оваа година, многу сум изненаден. Имав среќна година, се надевам дека и оваа пак- изјави Лотевски пред камерите.
Заедно со неговата тајфа, пеејќи ја песната на Богојавление, Лотевски се упати кон владиката Тимотеј, кој треба да го дарува, по што традиционално, учесниците во манифестацијата се собираат во ресторанот „Св. Софија“ во Охрид.
По ова, фаќачот на крстот тргнува куќа по куќа, за да ја сподели радоста и да им донесе среќа со светиот крст на домаќините.
