Таравари: Ќе ги убедуваме пратениците да ги поддржат амандманите за албанските прашања

Алијансата на Албанците нема да ја условува поддршката за уставните амандмани за Договорот со Грција, туку ќе се обидат да ги убедат пратениците да ги поддржат и нивните амандмани за албанските прашања. Ова вечерва го изјави Арбен Таравари од Алијансата на Албанците во вечерашното гостување на телевизија „Телма”.

-Имаме убава прилика да затвориме одредени прашања и да продолжиме со европската агенда. Ние би интервенирале со нашите амандмани што би се однесувале на две работи. Првата е во преамбулата, како што беше во Охридскиот рамковен договор, ништо повеќе и за употребата на албанскиот јазик да не биде поинаков од македонскиот јазик кој е 20 отсто, туку да стои македонски и албански јазик. Повторно во духот на Охридскиот договор и Декларацијата потпишана пред една година од политичките партии – рече Таравари.

Тој додаде дека Алијансата никогаш не условувала, но дека ова е моментот кога мислат дека нивните пратеници можат да ги убедат своите колеги во Парламентот да се направат одредени промени.