Српскиот дневен весник „Информер” во своето денешно издание проголта лажна вест сервирана од некогаш популарниот македонски ТВ водител, Миленко Неделковски.
Во текстот под насловот „Државен удар во Македонија – претседателот Иванов во домашен притвор: Заев глуми премиер, власта ја презеде амбасадата на САД”, српскиот весник повикувајќи се на изјава на Неделковски тврди дека Иванов е во домашен притвор, опколен од полициски специјалци кои наводно го држеле во заложништво.
Неделковски е уште пошокантен во својата изјава, па вели дека Иванов не смеел да прима ниту новинари.
-Потребно е да се земе предвид дека околу резиденцијата на претседателот Ѓорѓе Иванов е распореден службен специјален полициски одред, кој е директно подреден под премиерот Зоран Заев. Тоа значи дека претседателот е во таен куќен притвор. Не може слободно да комуницира преку телефон, бидејќи неговиот број се прислушкува, приемот на посетители е ограничен и нема право да прима новинари. Овој вид на државен удар трае веќе цели две години. – вели Неделковски за Информер.
Инаку, кабинетот на Иванов не е опколен од полициски сили и тој не се наоѓа во никаков домашен притвор. Информер, кој е еден од најчитаните дневни весници во соседна Србија, очигледно проголтал лажна вест.
Целата лажна вест на Информер, можете да ја прочитате ТУКА.
