Комплетно се почитуваат насоките и препораките за справување со корона вирусот, е заедничкиот став на техничкиот премиер Оливер Спасовски, министерот за здравство Венко Филипче и неговиот заменик, Арменд Арслани по денешната посета на граничниот премин „Табановце“, со цел проверка на системот за превенција од корона вирус на граничниот премин.
Спасовски посочи дека се почитуваат сите насоки дадени од Кризниот штаб за контрола на секој патник којшто влегува на македонска територија.
– За одбележување е дека се обезбедени посебни соби за изолација на сите гранични премини каде што фреквенцијата е поголема. Сакам да се заблагодарам на сите институции и организации коишто го почитуваат апелот и препораката од Владата за неорганизирање поголеми собири и со тоа се намалува и ризикот од пренесување на вирусот, рече претседателот на Владата Спасовски, уште еднаш апелирајќи на почитување на препораките од епидемиолозите.
Министерот за здравство, Венко Филипче, исто така, истакна дека координацијата е одлична и се заблагодари на припадниците на Министерството за внатрешни работи, коишто одлично се справуваат со оваа ситуација.
– Целосно се почитува алгоритамот за справување со вакви случаи, тоа значи дека се прашува секој патник од каде доаѓа и доколку доаѓа од ризичните региони се прави дополнително интервју дали бил во контакт со заболени лица, дали евентуално патникот има симптоми и доколку има се упатува во посебна изолирана соба, се прави контакт со епидемиолозите од Центарот за јавно здравје кои потоа, по потреба постапуваат според алгоритамот, посочи министерот Филипче.
Тој информираше дека првата и единствена пациентка со констатирана заразеност хоспитализирана на Клиниката за инфективни болести, неколку дена е без температура и полека влегува во постабилна фаза од болеста. Исто така, нема нови пациенти коишто во овој момент се тестираат за корона вирусот.
– Новина е што во текот на вчерашниот ден стигнаа контролните резултати од лабораторијата во Германија со која соработуваме, кои ги потврдија сите наши тестови, сите негативни и позитивниот на пациентката, што е обврска како супервизија на работата на нашата лабораторија во рамки на Институтот за јавно здравје. Воедно, набавката на дополнителна заштитна опрема е во тек. Во текот на вчерашниот ден, го потпишавме договорот за дезинфекциските средства и тие веќе од утре ќе бидат дистрибуирани со помош на локалната самоуправа во основните училишта, каде за тоа има потреба, посочи министерот Филипче.
