Македонија 14. октомври 2019. / 13:30

Собранието ќе пристапи кон Конвенцијата за намалување на бездржавјанство од 1961 година

Собранието ќе пристапи кон Конвенцијата за намалување на бездржавјанство од 1961 година

Претставништвото на Агенцијата на ОН за бегалци (УНХЦР) во Македонија го поздрави одобрувањето на Собранието за пристапување кон Конвенцијата за намалување на бездржавјанството од 1961 година.

Како што соопштија од претставништвото на УНХЦР, пристапувањето кон конвенциите за бездржавјанство е една од глобалните заложби кои ги прават државите со цел ставање крај на бездржавјанството до 2024 година.

Со последниот чекор, депонирањето инструменти на пристапување, што се очекува набрзо, Македонија ќе биде одговорна страна на двата клучни договора на ОН за бездржавјанство, Конвенцијата во врска со статусот на лицата без државјанство од 1954 година и Конвенцијата за намалување на бездржавјанството од 1961 година и ќе ја заокружи својата правна рамка за намалување и спречување на појавата на бездржавјанство на средината од десетгодишната кампања „Јас припаѓам“ отпочната од УНХЦР во 2014-та – се наведува во соопштението од УНХЦР.

Оттаму информираат дека претставничката на УНХЦР во Македонија, Моника Сандри, ја поздравила заложбата на Македонија за искоренување на бездржавјанството, покажана преку одобрувањето на пристапувањето кон Конвенцијата од 1961 година, кое беше најавено минатата недела кога државите се собраа во Женева да ги зајакнат напорите за искоренување на бездржавјанството во светот.

Во модерното време во кое живееме, кое носи белег на технолошки напредок и инвестирање во човечката добросостојба, не можеме да прифатиме сè уште луѓе да живеат без најосновниот услов за остварување на целосниот сет основни човекови права – формален идентитет. Немањето формален идентитет, или бездржавјанството, предизвикува екстремна ранливост: живот без формално образование, здравствени услугиили можност за вработување. Владата на Северна Македонија ја донесе вистинската одлука да спречи овие нешта никогаш повторно да не се случат со тоа што го вброи искоренувањето на бездржавјанството во своите највисоки приоритети и работи за остварување на концептот едно општество за сите, каде што никој не е изоставен – рече Сандри.

Бездржавјанството, како што посочуваат од УНХЦР, е проблем што влијае на милиони луѓе низ светот.