Денеска треба да се сослушаат двајца нови сведоци предложени од Бојан Јовановски, на рочиштето за случајот „Рекет“.
И на вчерашното рочиште сведочеа три лица предложени од Боки, меѓу кои и стилистот Сергеј Варошлија. Тој зборуваше дека Бојан Јовановски добивал подароци од познати модни брендови за да ги рекламира, бидејќи бил инфлуенсер.
Зборуваше и дека од летото 2018 интензивно се дружеле со Зоран Милески – Кичеец, кој истиот така беше обвинет, но призна вина и доби три години затвор.
Сведочеа и Марија Јанковска, сопственичка на продавница за оптика во Скопје и Алекс Кртов, сопственик на галерија.
Адвокатот на Јовановски, Сашо Дуковски, вчера од листата на сведоци,ги повлече предлозите да сведочат екс градоначалникот на Општина Центар, Владимир Тодоровиќ, Дејан Панделевски и сопругот на пратеничката Фросина Ременски, Јовче.
Со тоа листата на сведоци на Боки се намали на 9 лица. Поранешната специјална обвинителка Катица Јанева, пак, има предложено 13 сведоци меѓу кои се и најголем дел од обвинителите кои работеа во СЈО.
Јовановски во случајот е обвинет за перење пари и за примање награда за противзаконито влијание, а Јанева за злоупотреба на службената положба и овластувања.
