Интерпелацијата за вицепремиерот Никола Димитров, која предмалку ја покрена Опозицијата, беше проследена со реакција од СДСМ, кои ја сметаат за уште еден деструктивен пораз на ВМРО-ДПМНЕ.
-Секојдневно се докажува дека ВМРО-ДПМНЕ и Христијан Мицкоски, се целосно загубени во времето и просторот, без став, без идеи, без програма, фокусирани само на блокади, на кочења и деструкции на штета на државата и граѓаните. Затоа доживуваат порази од граѓаните, одново и одново. Никако да ги научат лекциите, се наведува во соопштението.
Тие сметаат дека Димитров ужива целосна доверба од пратениците на мнозинството, затоа што се бори за државните интереси.
-За потсетување, интерпелација за Димитров имаше и минатата година. Тогаш, одвај 20 пратеници на ВМРО-ДПМНЕ гласаа за неа. Исто ќе биде и оваа година. Оваа интерпелација ќе биде уште еден пораз за ВМРО ДПМНЕ, Димитров ужива целосна доверба од пратениците на мнозинството, затоа што се бори за државните интереси. Се додека ВМРО-ДПМНЕ се однесуваат вака неодговорно кон институциите, кон граѓаните и државата, ќе останат таму каде што се, во опозиција, велат од партијата.
