Професорите Рената Дескоска, Гордана Силјановска-Давкова, Денис Прешова, Татјана Каракамишева-Јовановска, Јетон Шасивари, Светомир Шкариќ и Александар Спасов, поладнево кај претседателот Стево Пендаровски ќе одржат состанок за да се изнајде правен модалитет за одложување на изборите.
Сите наведени експерти се избор на претседателот Стево Пендаровски. На средбата ќе присуствуваат и претседателот на Собранието, Талат Џафери и премиерот Оливер Спасовски.
Интересно е што во тимот на експерти на Пендаровски, се Гордана Силјановска Давкова која беше негов противкандидат за изборите и Татјана Каракамишева – Јовановска која важи за негов голем критичар.
Како што соопштија од Кабинетот на Претседателот, на денешната лидерска средба на која од СДСМ присуствуваа Зоран Заев и Љупчо Николовски, од ВМРО-ДПМНЕ, Христијан Мицкоски и Гордана Силјановска-Давкова, од ДУИ Бујар Османи и Изет Меџити, од Алијанса за Албанците, Зиадин Села и Арбен Таравари, од Алтернатива, Африм Гаши и Скендер Реџепи, од Движење Беса, Билал Касами и Арјанит Хоџа и од ДПА, Орхан Ибрахими и Фрумзим Даути бил постигнат консензус дека предвремените парламентарни избори закажани за 12 април, поради состојбата со коронавирусот Ковид-19 треба да се одложат.
– Присутните го овластија претседателот Стево Пендаровски веднаш да свика состанок со истакнати правни експерти за да се изнајде правен модалитет за одложување на изборите. Средбата ќе се одржи денеска во 16 часот во Вила Водно, се наведува во соопштението.
