„Имаме работа со влада за која магарињата вредат повеќе од човечките животи. Оваа магарешка влада на Заев е најнеуспешната во овие 29 години независност. Ако мислевме дека транзицијата беше нашиот најтемниот период, Заев со неговото работење не разубеди дека и од лошото има и полошо, рече лидерот на ВМРО-ДПМНЕ на денешниот протест организиран со возила.
Мицкоски додаде дека одговорноста не само кај Лидија Димова, туку таа е пример за лошото работење на целата влада.
„И да не се чудиме. Иако сакаат да ја локализираат одговорноста во само еден човек Лидија Димова, можам искрено и од срце да ви кажам дека не е таа причината за лошото раководење на институциите. Таа е последица и добар пример за лоша работа, за тоа како се краде народот, а богами и Европските пријатели. Ваквите магарешки работи на Заев се само неморалната вертикала во македонската политика каде се срушени сите граници за политичкиот морал“, рече Мицкоски.
Тој додаде дека власта е во фаза на пред византиска пропаст.
„Каде опиени од власт, од многу пари, беззаконие и политички блуд добиваат лажна сила, и надменост иако внатре се е труло и фиктивно, како што е фиктивен оној бројчаник кој Заев го ветуваше на Триумфалната порта, а никогаш не проработе. Сеачи на магла се тие. 4 години убедуваат дека само што не ни тргнало, а станало од ден на ден се полошо и полошо. Ниту еден проблем не решија, ниту едно прашање достоинствено не затворија“, смета Мицкоски.
