Менкиноски: Не можете да правите попис на луѓе кои ги нема во Македонија

Адвокатот Тони Менкиноски во гостувањето во Радио емисијата Филибастер зборувајќи во врска најавениот попис на населението во земјава рече дека решението кое е сега во моментов е избрзано, нефункционално и не подлежи на меѓународни стандарди.

Тој се сомнева дека очигледно станува збор за политички пазар кој претходно е правен и кој треба да се испорача кон одредени партии. Смета дека истиот ќе падне и нема така лесно да пројде во Собранието.

-Ако држави како Германија и други европски држави го откажуваат и пролонгираат пописот, а од кај нас се тврди дека пописот мора да биде во април месец тоа е навистина индикатор дека позади ова не стои право, туку постои политиката, вели Менкиноски.

Напоменува дека Меѓународните стандарди се јасни во оваа област и овој закон е надвор од тие стандарди. Според Менкиноски власта сака да попишува мртви луѓе.

-Не можете да правите попис на луѓе кои ги нема во Македонија. Треба да барате мртви луѓе и тие мртви луѓе да влезат во официјалната бројка. А тоа е толку важно за нас Македонците и македонската држава бидејќи имаме многу закони кои се важни од состојбата на теренот, поготово од тоа зависат многу процеси како Рамковниот договор итн. Мислам дека ова е избрзано, како и многу други решенија на Владата и мислам дека ќе падне, нема така лесно да им помине, вели Менкиноски.

Законот за попис е врзан со европска директива, но не знаеме која? Нема!, вели Менкиноски и додава дека власта сега го лаже народот демек е по скратена постапка. Според него постојат стандарди и правила до кои мора да се придржуваме.

-Вие можете еднаш да излажете, двапати. Ако постојано лажете, значи го добивате приматот на лажго и несериозен човек. Меѓународната заедница го нотираше тоа. Овдека се попишуваат основни човекови права, така да ние треба да знаеме колку е процентот на Македонци, Албанци и сите. Така да треба да ја знаеме вистинската слика. Не можете вие да прескокнувате одредени фази во процесот и да правите што сакате и вас што ви одговара, изјави Менкиновски.