Министерот за правда, Бојан Маричиќ, вели дека со координирањето меѓу Јавното обвинителство, Кривичниот суд и Министерството за внатрешни работи целта била да се врати Сашо Мијалков од бегство и не гледа ништо спорно во тоа што премиерот Зоран Заев изјави дека токму тој ја координирал акцијата.
Маричиќ во вечерашното интервју за „360 степени“ вели дека состанокот на клучните институции бил за да не се направи пропуст како за бегството на Никола Груевски.
– Овде се разговараше за бегство на човекот кој неколку дена подоцна веќе му беше изречена казна затвор од 12 години. Не зборуваме за монтиран случај, не беше целта на тој состанок да се монтира случај против било кого, туку целта беше како да се врати некој кој е во бегство. Некој за кој целата јавност беше заинтересирана, вели Маричиќ.
Тој вели дека на состанокот никој не навлегол во туѓи надлежности, туку секоја институција постапила максимално во рамки на своите надлежности и обврски. Премиерот Зоран Заев, рече дека токму тој го координирал процесот за да се изврши притисок врз Сашо Мијалков и тој да се јави во Јавното обвинителство. Оваа изјава, премиерот ја даде веднаш откако Мијалков се појави во јавноста.
