Клиниката за кожни болести ќе биде целосно затворена, персоналот треба да остане во двенеделна домашна изолација, а пациентите се веќе пуштени дома, велат од Министерството за здравство.
Одлуката доаѓа откако тестот за корона вирус на директорката на Клиниката, која пред пет дена се вратила од Италија, а во меѓувреме одела на работа, бил позитивен.
Во моментов во Клиниката се присутни епидемиолози и уште неколкумина вработени, чија задача е да ги подготват просториите за дезинфекција. Клиниката ќе остане затворена во следните две недели.
Пациентите на клиниката можат да го продолжат лекувањето и во домашни услови.
Министерот Венко Филипче, на прес-конференција, соопшти дека се идентификуваат сите лица со кои лекарката контактирала во изминатите пет дена, било да се работи за семејство, пријатели, колеги или пациенти.
Среќна околност, како што рече Филипче, е што таа изминатите пет дена директорката немала ангажман во амбулантата, каде што има и најголема фреквенција на пациенти.
