Македонија денеска од Европската Комисија доби чиста препорака за почеток на преговорите со ЕУ.
Во извештајот освен пофалбите за заложбите на владата, беа евидентирани и неколку точки кои треба да се унапредат.
Според извештајот, за вработување и за унапредување во јавната администрација сеуште се користи споилс системот, односно се вработуваат и унапредуваат блиски луѓе кои не се заслужни за таа позиција или за тоа работно место. Според ЕК за да се реши овој проблем потребна е силна политичка заложба.
-Земјата е умерено подготвена за реформите во јавната администрација. Добар напредок е направен со адаптирање на Стратегијата за реформа на јавната администрација и Програмата за реформи во управувањето со јавните финансии. Конкретни напори беа направени за зголемување на транспарентноста и одговорноста, како и вклучување на надворешни страни за креирање на политиките. Капацитетот на Министерството за информатичко општество и администрација треба да се подобри за водење и координирање на реформата во јавната администрација. Потребна е силна политичка заложба за гарантирање на професионализмот во јавната администрација, особено за високите управни назначувања, и почитување на принципите за транспарентност, мерит-системот и еднаквата застапеност во согласност со законот. – стои во извештајот за напредокот на државата.
