При пречекот на грчката делегација химната не се свирела затоа што доцнел авионот на Алексис Ципрас, рече синоќа премиерот Зоран Заев во неговото интервју во емисијата „Печат на неделата“ на 1 ТВ. Тој рече дека една од причините може да биде и тоа што на униформите на оркестарот пишува „Република Македонија“.
– Поради тоа што доцнеше авионот. Скративме голем дел од оние официјалности кои што беа и впрочем гледате, направивме едно убаво селфи, претставување на делегациите и слично. Дури скративме и двајца министри кои дискутираа, еден од наша страна, еден од грчка, за строго да ги средиме протоколите и квалитативноста на самиот настан за билатералните средби да добијат стварно на значење во неопходно време. Имаше многу работи важни на тет а тет средбата, на меѓувладината седница, на форумот со бизнисмените. Само се трудевме да стигнеме – одговори Заев.
Новинарот Сашо Орданоски го праша премиерот дека некој рече дека тоа што оркестарот има Република Македонија на ракавите е една од причините поради кои не е свирена химната?
– Значи може да постои таква причина или било што. Ние знаеме секој пат да се коригираме, можеше да се сошие или слично. Еве оркестрите заедно ќе бидат и таквите делови ќе бидат поклопени затоа што Уставот е јасен, каде што е „Република Македонија“ треба да биде „Република Северна Македонија“ – рече Заев.
Премиерот на оваа тема во интервјуто зборува во 5.10 минута.
