Еврокомесарот во заминување Јоханес Хан во интервју за „Фајненшл Тајмс“ ја повтори разочараноста што на Македонија и Албанија не им беше дозволено да почнат преговори за членство со Европската Унија.
Хан вели дека до блокада на преговорите дошло во момент кога требало да се зајакнат напорите за ЕУ да стане посилен светски играч и оти претставувало губење влијание во регионот, за кој вели дека е близок историски и географски на ЕУ, притоа оставајќи простор за Кина и Русија.
– Најболно е тоа што ЕУ не ги демонстрираше принципите на парнерство и одговорност, на кои секогаш се повикува и на кои секогаш се потпираме – потенцира Хан.
Еврокомесарот искажа фрустрираност од блокадата од францускиот претседател Емануел Макрон, напоменувајќи дека Париз ги спречл преговорите со Македонија, дури и откако земјата постигна договор со Грција за „исклучително чувствителниот проблем со името“.
Хан оцени дека тоа претставува навреда за годините што Еврокомисијата ги поминала во поставување на политичка рамка за договор и испратил погрешна порака до регионалните лидери.
– Процесот на пристапување е заснован на заслуги и ако не го признаеме напредокот, нема да има стимул за реформи – вели еврокомесарот.
Хан откри дека српскиот претседател Александар Вучиќ, по блокадата на преговорите за членство на Македонија и Албанија, му рекол дека не му е јасно зошто би бил мотивиран да го продолжи дијалогот со Приштина. Весникот оцени дека таквиот став е удар за ЕУ, која минала 10 години обидувајќи се да биде ментор во разговорите меѓу Белград и Приштина.
И покрај драматичниот крај на неговиот мандат, Хан вели дека е горд на прогресот направен додека тој ја извршувал функцијата во смисла на подобрување на односите во регионот. Тој потсети дека од 2015 година ЕУ во регионот инвестирала речиси една милијарда евра преку фондови за меѓусебно поврзување, а трговијата во рамки на регионот се зголемила за 20 отсто.
Хан, исто така, го пофали планот за укинување на таксите за роаминг за корисниците на мобилни телефони во регионот до 2021 година, врз основа на моделот на ЕУ. Еврокомесарот во заминување упати пофалби и за регионалната иницијатива за укинување на царинските бариери во трговијата.
