На 1 октомври, Скопје ќе биде домаќин на еден од најпрестижните светски настани – „Економист Ивентс“ (Economist Events) во организација на Економист (The Economist). Економист е најпознатиот неделен економски магазин кој има милионски тираж а основан е во далечната 1843 година.
Самитот во Скопје доаѓа во пресрет на се поизвесната одлука за доделување на датум за почеток на преговори за Северна Македонија и почеток на нова ера во евроинтеграциските процеси на Западен Балкан.
Оваа година е клучна затоа што станува збор за уникатна ситуација со оглед на очекуваниот Брегзит, нов состав на Европската комисија и Европскиот парламент, но и трговските војни на Соединетите Американски Држави и поместувањата на глобалната геополитичка мапа.
Во вакви услови југоисточните земји од Европа се обидуваат да имплементираат сериозни социјални и економски реформи со цел да се приближат до побогатите земји. Северна Македонија изминатава година даде нова надеж дека регионалните конфликти може да се решат и економијата да се придвижува напред. Во овој контекст Самитот на Економист односно „Economist Events“ ќе биде под насловот: „Зајакнување на моментумот за европска интеграција“.
Настанот е од исклучителна важност за Македонија, бидејќи е прв ваков светски настан кој се оддржува во нашата држава и прв настан на Економист во Македонија.
Се очекуваат околу 450 гости и новинари да го посетат настанот во Хилтон, од кои, голем број ќе бидат странски бизнисмени, политичари и менаџери на компании важни за регионалната амбиција за евроатлантски интеграции.
Меѓу гостите и панелистите се и поранешниот премиер на Грција Алексис Ципрас, Гај Верхофштат, поранешен Премиер на Белгија и актуелен Европратеник, Мартин Шулц поранешен Претседател на Европскиот парламент и помошникот американски државен секретар за Европа и Евроазија – Вес Мичел.
