Адвокатскиот тим на Катица Јанева и денеска прави увид во доказите за случајот Рекет. Ирена Фрчкоска и Дељо Кадиев, втор ден се во обвинителството за гонење организиран криминал и корупција, пренесува Сител.
Денеска увид во доказниот материјал прават без присуство на осомничената Јанева. Таа вчера час и половина порано го напушти обвинителството каде заедно со двајцата адвокати ги анализираше доказите кои ја сомничат за злоупотреба на службената положба.
Според изјавите на нејзините бранители, екс шефицата порано заминала од обвинителството заради куќниот ред на истражниот затвор Скопје.
Адвокатите на Јанева по вчерашниот увид изјавиа дека ги погледнале исказите на сведоците, меѓу нив и сведочењата на обвинителите од СЈО – Елизабета Јосифовска, Лиле Стефанова и Бурим Рустеми.
Увид во доказите од предметот, неделава правеше и првоосомничениот Бојан Јовановски. Тој завчера четири часа заедно со својот адвокат Сашо Дуковски ги разгледуваше доказите за Рекет.
Бидејќи дел од вештачењата не биле завршени, одбраната на Боки 13 најави дека увидот во доказите ќе го продолжи во понеделник.
