Агенцијата за филм денеска одржа средба со новинарите на која, меѓу другото, беше истакнато дека новиот слоган „Нов филмски бран” подразбира дека ќе се поддржуваат млади, талентирани филмаџии и ќе се залага за поцврсто мапирање во европската кинематографија поради квалитетот и стандардот на кој се инсистира. На денешната средба присуствуваа Горјан Тозија, директор на Агенцијата за филм и Александар Касапинов, Претседател на Управниот одбор на Агенцијата за филм.
Оваа година поради кризата со Ковид-19, конкурсот на Агенцијата се стави во мирување за време на прогласената вонредна состојба, но со враќањето во новата нормала, процесот продолжува. Според Законот за Општата управна постапка, роковите престануваат да течат за време на вонредната состојба и продолжуваат по истекот на истата за онолку денови колку што преостанале. Според тоа, резултатите од Конкурсот за финансирање на производство на долгометражен и краткометражен, игран, документарен и анимиран филм за 2020 ќе бидат објавени кон крајот на месец јули. Исто така, Агенцијата во соработка со Друштвото на Филмски Работници подготви Протокол за снимање филм во време на Ковид-19, кој е доставен до Комисијата за заразни болести и се чека на одобрување, соопштија од Агенцијата.
Тие подвлекуваат оти Агенцијата за филм се залага за транспарентно работење и за таа цел издаде по теркот на многуте Агенции за филм во Европа, Отчет за потрошениот буџет во 2019 “Факти и Бројки” https://project.mk/NMFA/portfolio/images/WEB_BROSHURA_2019.pdf
Она на што сме посебни горди е и статистиката во последните години во однос на дебитанти режисери, дебитанти продуценти и зголеменото учество на жени режисери и продуценти. Последните 8 проекти кои се или во завршна фаза или пред премиера, дури 6 од нив отпаѓаат на дебитанти режисери и продуценти”, изјави Горјан Тозија, директор на Агенцијата за филм
После историскиот успех на македонската кинематографија во 2019 со “Медена земја” (Тамара Котевска и Љубомир Стефанов), но и “Господ постои нејзиното име е Петрунија” (Теона Митевска), македонските филмови освоија повеќе од 60 награди, 2020 е година кога повторно сме на Санденс со “Налепница” на Филип Унковски, “Снежана на крајот умирa” на Кристијан Ристевски ќе биде прикажан во рамките на фестивалот во Карлови Вари, а на е-павилјонот на Канскиот фестивал Македонија ќе презентира 8 играни филмови, рекоа од Агенцијата за филм.
