Тим научници од универзитетот Кардиф откриле метод што го уништува ракот на простатата, градите, белите дробови и другите органи при лабораториско тестирање
Откритието, за кое се смета дека има голем потенцијал, беше објавено во списанието Nature Immunology, а сè уште не е тестирано на пациенти. Иако ова медицинско истражување е во рана фаза, се верува дека новооткриената клетка во човечкиот имунолошки систем може да уништи секаков вид рак.
Британските научници ги испитале неконвенционалните начини на кои имунолошкиот систем напаѓа тумори и откриле дека клучот е Т-клетката во човечката крв. Оваа имунолошка клетка може да го скенира телото и во исто време да процени дали постои „закана“ што треба да се елиминира. Може да напаѓа и разни видови на карцином.
Чудесна клетка
Според истражувачот Ендру Севел, ова откритие создава шанса секој пациент да биде лекуван. Т-клетките имаат рецептори на површината што им овозможуваат да „гледаат“ на хемиско ниво. Сега се истражува како тие го прават тоа.
„Ние сме први кои ја опишуваме Т-клетката која наоѓа МНР1 во клетките на ракот, што не е направено порано, и ова е прво истражување од ваков вид“, рекол научникот Гери Далтон.
Терапија против карцином
Идејата е да се земе примерок од крв од пациенти со карцином и да се извадат нивните Т-клетки, а потоа генетски модифицирани за да се репрограмираат за да станат рецептор за откривање на карцином. Надградените клетки ќе се одгледуваат во огромни количини во лаборатории и потоа ќе се вратат на пациентот. Постапката е иста како и за терапиите со CAR-T.
Иако сè уште е во раните фази, овој истражувачки проект е значаен чекор напред во откривањето на терапиите против рак, а научниците се надеваат дека експериментите врз луѓето ќе покажат задоволителни резултати.
