Изутринава се забележани минусни температури на територијата на целата земја, а најниската температура е измерена во Маврово –9 и во Берово и Крива Паланка – 8 степени. Во Крушево температурата била -7 степени, во Прилеп, Виница и Куманово -5, во Штип -4, Скопје-Петровец -3, Скопје-Зајчев Рид, Струмица и Дебар -2, во Демир Капија и Дојран -1, во Гевгелија 1, во Охрид 0 и во Претор 2 степени.
Најмногу снег има на Попова Шапка, 40 сантиметри, каде утрово повторно паѓаше ситен снег.
Дожд имаше и во повеќе делови од земјата, а најмногу наврнал во Пожаране и Охрид – 12 литри на метар квадратен.
Вдолж Повардарието ноќеска и утрово дува засилен ветер од северозападен правец, на места со брзина над 50 км/час, а во источните делови е претежно ведро.
Времето денеска ќе биде сончево и студено, со мала, а во западните делови умерена облачност. Ќе дува умерен, вдолж Повардарието засилен ветер од северозападен правец, особено претпладне. Максималната температура ќе достигне од -2 до 6 степени.
Во Скопје времето ќе биде сончево и студено со мала, а попладне умерена облачност. Ќе дува умерен, повремено засилен северен ветер. Максималната температура ќе достигне до три степени.
