Портпаролот на СВР Тетово, Фатмир Реџепи потврди дека вкупно седум лица се уапсени за вчерашната вооружена престрелка во Тетово, а се трага по уште инволвирани.
Тој не даде подетални информации за кои рече дека се очекуваат да се објават по целосното расветлување на случајот и мотивите на престрелката.
Повикувајќи се на свои, неофицијални извори, порталот PaCensurë ги објави иницијалите на 4-ца уапсени, мегу кои иницијалите на едниот од уапсените се совпаѓаат со оние на високиот функционер на ДУИ, поранешен заменик директор на УЈП. На полицијата денеска ѝ се предале А.М., В.А., А.М. и А.И. што веднаш се земени на распит. Инцидентот се случи вчера, по расправија во казиното „Аладин“ меѓу две групи што потоа излегле на булевар „Илирија“ и пукале меѓу себе со пиштоли и калашникови. Едно лице било рането, повеќе куршуми завршија во локалите, а од заскитани куршуми бил оштетен и еден автомобил паркиран во близина. Нема човечки жртви од инцидентот.
Реџепи истакна дека дополнителни информации ќе има по целосно расветлување на случајот.
