Во американската сојузна држава Ново Мексико починале тројца, а едно лице останало трајно слепо поради труење со метанол откако пиеле средство за дезинфекција на раце.
Како што соопштија здравствените власти, уште три други лица се во критична состојба.
Веруваме дека сите седум лица пиеле средство за дезинфекција на раце кое содржи метанол. Случаите се поврзани со алкохолизам – се наведува во соопштението од министерството за здравство на американската сојузна држава Ново Мексико.
Се претпоставува дека некои луѓе пиеле средство за дезинфекција како замена за алкохол. Пред пандемијата, во повеќе затвори средствата за дезинфекција беа забранети од страв дека затворениците ќе ги пијат.
Ако сте пиеле или конзумирале средство за дезинфекција на раце кое содржи метанол, веднаш да се јавите кај лекар. Достапен е противотров за труење со метанол и што побрзо се почне со лекување, толку е поголема веројатноста за излекување на пациентот – изјави државната министерка за здравство, Кејти Кункел.
Изложување на големи количини на метанол може да резултира со мачнина, повраќање, главоболка, замаглен вид, трајно слепило, напади, кома, трајни оштетувања на нервниот систем или смрт.
