Новоизбраниот претседател на Соединетите Американски Држави, Џо Бајден, им се обрати на граѓаните на Делавер пред да се качи во приватен авион и да се упати кон Вашингтон, каде утре треба да биде инаугуриран и официјално да ја преземе функцијата прв човек на САД.
Неговото заминување со авион беше уште една промена во протоколот, а за време на неговиот говор им се заблагодари на луѓето кои беа „поддршка на неговиот пат, и во добро и во лошо време“.
– Ова е емотивно. Преку добро и лошо, сакам да ви се заблагодарам на сите мои сограѓани во Делавер во име на целото семејство Бајден. Сакаме да ви кажеме колку значи тоа за секој од нас. Затоа, многу е лично што моето следно патување во Вашингтон започнува тука, на место што најдобро претставува кои сме ние Американците. Знам дека ова се темни времиња, но секогаш има светло. Тоа е она што ја прави оваа земја посебна. Тоа е она што ме научи, дека секогаш има светлина, рече Бајден за време на говорот пред седиштето на Националната гарда во Делавер.
Бајден рече дека е горд што ја сподели својата порака со граѓаните пред центарот на Националната гарда, која е именувана по неговиот покоен син Боу, и во еден момент тој заплака.
