Специјалните полициски сили на Ерменија денеска уапсија 77 демонстранти, кои ја блокираа зградата на Владата и бараа оставка од премиерот Никол Пашињан.
Пашињан и другите членови на Владата успеаја да влезат во зградата и покрај протестот.
– Сега целта ни е да не излезат од зградата додека Никол Пашињан не поднесе оставка, изјави членот на опозициската партија Дашнактсутиун, Ишахан Сагателиан.
Претседателот на Ерменија, Армен Саркисијан претходно повика на организирање на вонредни парламентарни избори, а Пашињан наведе дека не планира да поднесе оставка, бидејќи владите треба да се менуваат само на избори.
Ерменската опозиција смета дека заедничката изјава што Пашињан на 9 ноември ја потпиша со претседателите на Русија и на Азербејџан, Владимир Путин и Илхам Алиев, со која заврши судирот во Нагорно-Карабах, всушност е предавство на земјата.
Опозицијата исто така го обвинува Пашињан за економските и социјалните промлеми во Ерменија.
