Светската здравствена организација предупреди дека епидемијата на Ковид-19 може да „тлее“ во Африка неколку години и во следните 12 месеци да убие и до 190.000 луѓе.
СЗО минатиот месец предупреди дека во рок од шест месеци на црниот континент би можело да има 10 милиони заразени, иако експертите велат дека влијанието на пандемијата ќе зависи од дејствијата на владите.
Студијата, објавена од СЗО оваа недела, предвидува дека меѓу 29 и 44 милиони луѓе би можеле да бидат заразени во првата година од пандемија ако не успеат рестриктивните мерки. Тоа „ќе го надмине расположливиот медицински капацитет во поголемиот дел од Африка“, каде има само девет легла за интензивна нега на милион луѓе.
Додека Ковид-19 во Африка веројатно нема да се прошири толку експоненцијално, како на други места во светот, најверојатно ќе тлее во одредени жаришта. Ковид-19 би можел да стане пресвртница во нашите животи во следните неколку години, ако владите во регионот не заземат проактивен пристап – изјави директорот на СЗО за Африка, Матшидисо Моети.
Повеќе од 51.000 луѓе во Африка се заразени, а 2.012 починаа. Вкупниот број на случаи нагло се зголеми во текот на изминатата недела.
