Либиските сили лојални на генералот Калифа Хафтар соопштија дека од полноќ стапил во сила прекинот на огнот во западниот дел на земјата, во кој е вклучен и главниот град Триполи.
Портпаролот на Либиската национална армија, Ахмад Мисмари, наведе дека нивните сили го прифаќаат примирјето под услов и втората страна да се придржува кон него.
Мисмари предупреди дека какво било прекршување на примријето ќе наиде на жесток одговор од нивна страна.
Либија во моментов има две извршни власти – меѓународно признатата Влада на национално единство на премиерот Фајез ал-Сараџ во Триполи и привремената влада на Абдулах ал-Тани на истокот од земјата, која е поддржана од Либиската национална армија на генералот Калифа Хафтар.
Борбите околу Триполи ескалираа во последните неколку недели откако Хафтар објави дека тргнува во конечна битка за престолнината.
