Најновата анкета на Евробарометар покажува дека Италија стана најевроскептична земја во Европската Унија бидејќи само 44 отсто од Италијанците би гласале да останат во блокот ако се одржи референдум. Резултатите од анкетата се многу поразлични кога станува збор за еврото, па 65 отсто од Италијанците велат дека поддржуваат Италија да продолжи да ја користи евовалутата, пренесува „Ил џорнале“.
Популистичкиот италијански министер за внатрешни работи, Матео Салвини, реагираше на податоците што се однесуваат на ЕУ:
„Сега на сите им е јасно дека треба да се преосноваат. Сонувам за Европа што прави малку работи, но ги прави добро. Европските избори следната година ќе бидат историски настан. Очекувам гласови од целиот континент за оние што сакаат да ги почитуваат нивните идентитети и народи, а против арогантните наметнувања на финансиските шпекуланти и апсурдните закони на бирократите што живеат на друга планета. Тоа ќе биде нова европска пролет на слободата”, рече Салвини.
