Хуманитарниот брод ,,Аквариус”, кој во либиските води спаси 141 мигранти, нема дозвола за да вплови во италијанско пристаниште. Од таму порачуваат дека Рим не ги сака и ја повикаа Европската Унија и Британија на помош.
Бродот во сопственост на француско – германско хуманитарно здружение ги спаси мигрантите во две одделни операции и сега се наоѓа во водите меѓу Италија и Малта. Во јуни истиот брод помина девет дена на море откако новата италијанска влада не му дозволи да вплови во пристаниште, нарекувајќи ги активистите такси служба и криумчари на луѓе.
,,Може да одат каде сакаат, ама не и во Италија”, порача на твитер министерот за внатрешни работи, Матео Салвини. Тој ги навел и Франција, Германија, Британија и Малта како дестинации за овие мигранти.
