Рекордно високите температури оваа пролет придонесоа за предвремена летна атмосфера во обично свежата северна Европа дури и до Лапонија, неколку недели пред самиот почеток на летото.
Германија, Полска и нордиската област поминаа невообичаено топол мај, на некои места најтоплиот во повеќе децении, а невообичаено топло е и во балтичките земји.
Полска телевизија пренесува дека ова е најтоплиот мај во последните 129 години, а овогодинешниот април беше третиот најтопол месец од кога официјално се регистрираат мерењата.
Температурата во Варшава денеска изнесува 30 степени Целзиусови.
Високи температури ја влошуваат сушата, па така земјоделците во Германија се жалат на штета предизвикана од сувото време.
Во Берлин температурата денеска изнесува 32 степени Целзиусови.
Во нордискиот дел на Европа – Данска, Финска, Норвешка и Шведска, забележани се високи температури без дожд во поголемиот дел во текот на месец мај.
Во големиот дел од Шведска овој мај е најтоплиот во последните децении.
Во Данска и Норвешка температурите надминуваа 30 степени Целзиусови.
Норвешките метеоролози велат дека ова е најтоплиот мај во претходните 70 година на југоисток во оваа земја, и предупредуваат дека претерано високите температури без дожд би можеле да ги погодат животните и животната околина, односно да поттикнат шумски пожари.
Финскиот метеоролошки институт соопшти дека топлотниот бран стигнал и до Лапонија, најсеверната област на Европа која опфаќа делови од Финска, Шведска и Норвешка.
