Еден од најнапредните американски уништувачи на ракети, УСС „Милијус“, во вторникот пристигна во Јапонија за да ја зацврсти одбраната од севернокорејските балистички ракети или, пак, од кој било во Источна Азија, пренесува „Ројтерс“.
Пристигнувањето на воениот брод во морнарската база „Јокосука“ доаѓа на три недели пред средбата помеѓу американскиот претседател, Доналд Трамп, и севернокорејскиот лидер, Ким Џонг-ун, во Сингапур.
Демонстрацијата на сила од страна на САД е потсетувањето за воениот притисок кој може да се искористи над Северна Кореја, со оглед на тоа што Вашингтон инсистира земјата да се откаже од своите нуклеарни оружја и програмата за балистички ракети.
„Милијус“ ќе ја поддржи „безбедноста и стабилноста во Индопацифичкиот Регион преку носењето на зголемените безбедносни капацитети во вид на одбрана од балистички ракети“, изјавија од американската морнарица.
Претходно, Северна Кореја најави дека сè уште размислува околу одржувањето на средбата помеѓу Трамп и Ким, откако ги откажа одвоените разговори со Јужна Кореја како протест поради заедничките воздухопловни воени вежби на Вашингтон и Сеул, додава „Ројтерс“.
