Мутираниот вид на коронавирусот, кој за прв пат беше откриен во Велика Британија, е пронајден и во Австрија, објави денеска австрискиот министер за здравство, Рудолф Аншобер.
-Со новиот вид на вирусот заразени се четири лица во главниот град Виена, рече Аншобер.
Сите четири лица биле доброволно тестирани на аеродромот во австриската престолнина.
Меѓу заразените е и 12-годишно девојче кое пристигнало во Австрија на 18 декември, додаде министерот. Сите заразени лица засега имаат само благи симптоми и во моментов се во самоизолација.
Друг заразен е 30-годишен Австриец, кој во земјата дошол на 6 декември од Јужна Африка.
Новата мутација, за која се смета дека е многу позаразна од претходните соеви, првично беше откриена во Велика Британија и сега се шири во европските земји.
Според досегашните сознанија, коронавирусот е помалку подложен на мутации отколку вирусот на грип.
