Доминик Камингс, најмоќниот советник на британскиот премиер Борис Џонсон, ќе го напушти Даунинг стрит кон средината на декември, бидејќи Џонсон се обидува да го реорганизира кабинетот по неуспешната битка со пандемијата.
Фотограф на Ројтерс го снимил Камингс како вечерва излегува со кутија од седиштето на британската влада. Би-Би-Си, Скај Њуз и други медиуми објавија дека ова значи дека Камингс ја напушта својата функција. Но, Даунинг стрит објави дека Камингс ќе продолжи да работи за Џонсон до средината на декември, иако е нејасно како и дали ќе се врати во зградата.
Џонсон се соочува со отпор околу идната насока на владата, додека истовремено се бори со најсмртоносната епидемија на коронавирус во Европа.
Исто така, се обидува да воспостави односи со новоизбраниот американски претседател Џо Бајден и да ги совлада деликатните дипломатски преговори за трговскиот договор со Европската унија во последен момент.
Камингс, кој ја водел кампањата за референдумот за Брегзит 2016 година и е заслужен за убедливата победа на Џонсон во 2019 година, изјавил за Би-Би-Си дека ќе биде вишок до крајот на оваа година, откако ќе заврши периодот на транзиција по Брегзит.
Конзервативните пратеници вршат притисок врз Џонсон да ја реорганизира неговата администрација и да се справи со пандемијата на коронавирусот што ја уништува британската економија.
Заминувањето на влијателната десна рака на Џонсон претставува една од најзначајните промени во блискиот круг на премиерот, бидејќи некои сметаа дека Камингс е „мозокот“ на Џонсон.
