Јапонскиот цар Нарухито, во својот прв говор во новата година изрази желба 2020 да помине без природни катастрофи.
Царот кој го наследи престолот минатата година во мај, царицата Масако и другите членови на семејството ги поздравија десетиците илјади Јапонци кои се собраа пред кралската палата.
– Мило ми е што ја прославувам Новата година со вас. Но, во исто време, се грижам за луѓето кои минатата година беа погодени од тајфуни и обилни дождови. Се надевам дека оваа нова година ќе биде убава, мирна и без природни катастрофи – истакна Нарухито.
Двапати годишно, за Нова Година и за неговиот роденден, јапонскиот цар се појавува на балконот на палатата. Во оваа пригода до него беа и поранешниот цар Акихито кој абдицираше на 30 април, што беше прв таков потег во земјата за 200 години, и поранешната царица Мичико.
