Италија е подготвена да прогласи вонредна состојба во Венеција откако висината на брановите во тој град достигнаа 1,87 метри, поплавувајќи ја историската базилика Свети Марко и прекинувајќи го снабдувањето со електрична енергија за домаќинствата.
Повеќе од 80 отсто од градот, кој е под заштита на УНЕСКО, беше под вода во моментите кога плимата беше најсилна, јави Би Би Си.
Италијанскиот премиер Џузепе Конте ја опиша поплавата како удар во срцето на земјата. Тој потенцираше дека Владата ќе дејствува брзо за да обезбеди средства и ресурси.
– Ме боли што градот е толку оштетен, уметничкото наследство е загрозено, комерцијалните активности се на колена – напиша Конте на Фејсбук по посетата на Венеција.
Sto rientrando di corsa a Roma dopo avere constatato di persona i danni che il maltempo ha provocato a Venezia. Ho…
Posted by Giuseppe Conte on Четврток, 14 ноември 2019
Конте истакна дека Владата ќе ја забрза изградбата на структурната одбрана на градот, мислејќи на т.н. Мосеов проект – хидрауличен систем на бариери за заштита на лагуните во случај на зголемување на нивото на морето и зимските бури. Се очекува во текот на денот да биде прогласена вонредна состојба во Венеција.
Во меѓувреме, жителите на Венеција се се разбудија со звукот на сирените, што укажува дека плимата ќе остане висока, иако не се очекува да надмине 130 сантиметри над морето.
Градоначалникот на Венеција Луиџи Буруњаро вчера изјави дека штетите во овој историски град по најголемата поплава во последните 50 години ќе бидат стотици милиони евра. Во поплавата загинаa и двајца повозрасни мажи.
Нивото на водата завчера достигна 187 сантиметри, највисоко ниво досега забележано во Венеција, а само седум сантиметри помалку од највисокото забележано ниво во историјата.
Во Венеција, криптата под базиликата Свети Марко беше поплавена по вторпат во историјата, при што вода влегувала и низ прозорците.
Поплавата е предизвикана од поројниот дожд што се совпадна со полната месечина што донесе висока плима. Исто така, градот испреплетен со канали е во опасност и поради зголемувањето на нивото на морето како резултат на климатските промени.
