Руско-турскиот договор за сириската провинција Идлиб мора да ги заштити цивилите и да овозможи пристап за помош, соопшти денеска Европската унија.
– Очекуваме договорот кој вчера го постигнаа рускиот и турскиот претседател да гарантира заштита на животите на цивилите и инфраструктурата како и непречен и одржлив хуманитарен пристап, изјави претставник на ЕУ.
Претседателите на Русија и Турција, Владимир Путин и Реџеп Тајип Ердоган вчера на средба во Сочи договорија формирање демилитаризирана зона во сириската провинција Идлиб долж линијата на фронтот меѓу бунтовничките сили и единиците на сириската армија.
Според договореното, зоната ќе биде широка 15 до 20 километри и ќе се простира по целата должина на фронтот. Се очекуваа оваа зона и официјално да биде воспоставена до 15 октомври, а руски и турски војници ќе бидат испратени да патролираат долж неа.
Путин најави дека до 10 октомври од оваа зона ќе биде повлечено целото тешко вооружување на сириската армија, и оти Русија ќе бара повлекување на сите исламистички групи и од зоната, пред се на фронтот Ал Нусра.
По средбата Путин-Ердоган, рускиот министер за одбрана Сергеј Шојгу најави дека нема да има нова воена операција во Идлиб.
Неколку недели, сириските, руските и иранските сили најавуваат освојување на оваа зона, во која се смета дека живеат три милиони луѓе и која е под контрола на бунтовнички групи, вклучително и исламисти. Турција бараше од Русија и Иран да ја откажат офанзивата, која е во своите првични фази.
Путин вчера најави дека разговорите со Ердоган овозможиле да дојде до сериозен напредок во решавањето на проблемот со исламистичките групи во Идлиб.
