Свет 17. април 2020. / 23:36

Белгиски универзитет го анализира имунолошкиот систем пред и по заразата со Ковид-19

Белгиски универзитет го анализира имунолошкиот систем пред и по заразата со Ковид-19

Белгискиот универзитет ВУБ работи на анализи на крвта на заразени пациенти со Ковид-19 за да утврди како реагира имунолошкиот систем, што треба да помогне за развој на третман за оваа болест.

Научниците објаснуваат дека имунолошкиот систем реагира на различни начини кога е нападнат од вирус: тој може да се заштити, но може и да има прекумерна одбранбена реакција, преку масовно производство на молекули кое го загрозува животот на пациентот.

Универзитетскиот тим ќе ги анализира разните имунолошки параметри, како тие реагираат и колку време остануваат активни. Тие се надеваат дека преку разбирање на тоа кои компоненти на имунолошкиот систем се позитивни, а кои се негативни, би било возможно да се изнајде третман побргу и поефикасно.

Сепак, научната заедница е согласна дека единствено ефикасно решение за да и се стави крај на пандемијата е вакцината. Меѓутоа, подобро разбирање и анализа на реакциите на имунолошкиот систем треба да придонесе и за развојот на безбедна и ефикасна вакцина.